نماز ارکان اسلام میں سے اہم ترین رکن اور ایسا فرض ہے جس کے بغیر ہم مسلمان نہیں ہوسکتے اور ترک نماز سے انسان کی کچھ حیثیت باقی نہیں رہ جاتی- یہی وہ عمل ہے جس کو حبیب خدا صلی اللہ علیہ وسلم نے اپنی آنکھوں کی ٹھنڈک اور دین کا ستون قراردیا-زیر نظرکتابچہ کی غرض وغایت یہی ہے کہ وہ مسلمان بھائی جونمازنہیں پڑھتے، پہلے اس کو پڑھیں اور نماز کے بعد اس کےبارے میں اللہ اور اس کے رسول صلی اللہ علیہ وسلم کے احکام سے آگاہ ہوں- نیز وہ مسلمان بھائی جواقامت صلاۃ تو اختیار کرتے ہیں لیکن مسجد میں باجماعت پڑھنے کی فضیلت اور اس سے متعلق احکام سے ناواقف ہیں اور وہ جونماز کے ارکان وواجبات کی مشروع پابندی کو اختیار نہیں کرتے بلکہ ایک حد تک اس کا علم ہی نہیں رکھتے، اس کتابچے کے مطالعہ سے صحیح احادیث کی روشنی میں نماز کے فضائل ودرجات سے آگاہ ہوکر اس کی پابندی اختیار کریں گے-ان شاء اللہ-مصنف نے نماز کی اہمیت کے پیش نظر فضیلت نماز،نماز کے فوائد، نماز باجماعت کی ادائیگی کا ثواب اور نماز کے بعد مختلف ذکر واذکار کی فضیلت کو بیان کرنے کے ساتھ ساتھ نماز اشراق کی فضیلت کو احسن انداز سے بیان کردیا ہے-